تعريف بمواد السنة الأولى

موضوع: تعريف بمواد السنة الأولى 26/9/2010, 3:43 am

الفصل الأول :

هذا الفصل عندكم 7 مواد وهي على النحو التالي :
رياضيات1: بيعطي هي المادة دكتور كويس كتيييييييييييييييير اسمه (ابراهيم كيالة) المادة مو صعبة كتير بس بدا متابعة من الأول
بالعملي منشان تجيبو علامة عملي كويسة وبعدين الامتحان سهل لأنو بتكونو دارسين
أنا وقت كنت سنة أولى ماتابعت بالعملي فإجت علامتي 22 فقط بس عوضت بالنظري وجت 50 من 60
والمحصلة كانت 72 وطبعا من أول دورة ................
والمادة تتكون من دروس في المصفوفات بسيطة كتير وبعدين تكاملات صعب شوي فركزو عليه

الفيزياء1 : مادة يمكن ما رح تحبوا كتير وبدكو تقولوا شو دخلنا نحنا الطبوغرافيا بالفيزياء
على كل المادة موجودة ومطرين تدرسوا
المهم بيعطيكن المادة دكتور جدي ما بذكر اسمه بس كنيته (الناشد)وهو دكتور بكلية العلوم
درسو المادة بصم بتجي نفسا من المحاضرات
الدكتور ما بنزل محاضرات يعدني بدكن تحضروا لتكتبو وراه
وبالنسبة للعملي فبتحضرو بالمخبر بمبنى الإتحادات العربية. العملي صعب شوي ويمكن ما تفهمو بس بالامتحان العملي طبعا
كل واحد وحظو بالتجربة اذا سهلة جاب عملي كويس و إذا صعبة فهو و شطارتو
عندكم سبع تجارب أي 7 حصص عملي و كل أسبوع حصة وحدة ..........وبس
عكل لا تنسو تصورو التجارب بالموبايل حتى ما تنسوا وترجعو تتذكروها وقت الامتحان

التمثيل الهندسي 1(الوصفية):هي المادة صعبة كتير واذا روحتو شي حصة نظري أو عملي يمكن ما تعودو تفهمو بعدا
عكل لا تروحو على حالكن شي من الأول .المادة بيعطيها دكتور طيب كتير كتير اسمو ( والله ما بذكر )
هلق ما بهمكن اسمو المهم هوي.... انو هوي بيفهم و بفهم
ركزو كتير على العملي ولا تحاولو تساووا نسخ و لصق من المعيدات بالمراسم لأنو هيك ما بتفهموا شي
وحاولو تجيبو المعيدات لعندكم على المرسم وتخلوها تشرحلكم والمعيدات بساعدوكم و ما بقصروا ...بس

العربي و اللغة1 و القومية : معلومات عامة وسهلة ولا تخافو منن بيطلعو ان شاء الله
من أول دورة وهدول هنن مواد لازم تكون معدلات لا تفوتوهم على حالكم ....بظن بكفي

جيولوجيا : الحقيقة أنا لي قصة مع هذه المادة حيث أنني قدمتها 4 مرات لحتا طلعت لا تخافو كتير لأنو الدكتور يلي كان يخوفنا من المادة طار
وهلق الدكتور يلي بدو يدرسكن اسمو ( وهيب سهوان ) من حماه .
دكتور كتير طيب وأنا ما طالعتا لحتا إجا هذا الدكتور
على كل المادة قسم نظري بيعطيكن ياه الدكتور وقسم عملي بيعطوكن ياه معيدين و معيدات
بمخبر الجيولوجيا يلي رح ما تحبو ........متلي
المادة بدى شغل وفهم بالعملي و بالأخص الخرائط ركزوا كتير عليهن ماشي ........وبس

الفصل الثاني:

هذا الفصل عندكم 5 مواد :

اللغة2 : مثل اللغة 1 عامة و سهلة...وبكفي

أتوكاد : مادة سهل تجيبو فيها علامة كويسة بالعملي من وجهة نظري لأنو أنا جبت 40 من 40
المهم الدرس بتاخدو بالنظري بتروحوا على البيت بتتمرنو عليه ولا تهملو من شان ما تنسو
دكتور المادة اسمو
الدكتور على فكرة نسونجي شوي أو ولى قلكن كتيييييييييييييير ورح هو يثبتلكم من أول جلسة
المادة مو سهلة كتير بدى تمرين بس كمان لا تخافو منها .......وبس

الفيزياء2:مادة نظري بتاخدو بالكلية
والعملي بتاخدو بكلية العلوم مادة بيجي امتحانا سهل ومكرر من أسئلة الدورات
وبذكر كأنو دكتور المادة اسمو ( جمال قاسم الشر ) ......وبكفي

التمثيل 2 : مادة أساسية وبدى شوية انتباه
أهم شي لا تزعجو الدكتور بحصة النظري لأنو اذا أزعجتو بربي فيكو القرود الزرق
هيك صار بدورتنا أنا طالعت المادة (60)
المادة عبارة عن رسم مساقط ومناظير للقطع الميكانيكة
ورسم واجهات
و شوية مقاطع ترابية

الرياضيات 2 : أول الشي لازم تعرفو أنو نفس الدكتور ونفس الطريقة
يعني بالمختصر المفيد نفس ر1 بس المنهاج بيختلف شوي كمان المادة سهلة كتتتتتير
ومادة معدل والعملي فيها كتتير سهل وبسهولة خرج الواحد يجيب 40
عكل أنا مليت من كتر الحكي وبعتقد هدول هني موادك
موفقين إن شاء الله وان شاء الله منشوفكم سنة خامسة

الموضوع تعبت عليه أرجو الرد بكلمة شكر بسيطة لأعرف أن هناك من قرأ الموضوع لأخره

» تعريف بمواد السنة الثانية
» تعريف مواد الفصل الثاني
» يوميات طالب في السنة الثالثة
» برنامج السنة لأولى ( الفصل الأول )
» برنامج السنة الثانية ( الفصل الأول )